بعد الحلقة الأولى من يوميات الدكتور ابراهيم فرج، هنا الحلقة الثانية حول مشاهداته وانطباعاته كطبيب جرّاح في المستشفى اللبناني – الايطالي في صور :
مذا يقول المنطق؟
المنطق بقول :
يلّلي قادِر يفرُض وقف إطلاق النار من خلال التحكّم ب آليّة فتح واغلاق “مضيق هرمز”(!) ، أو غيره، بيكون قادر يفرُض عدم تدمير البيوت في قرانا (٥٥قرية وأكثر) ووقف تغيّير معالمها والسماح بِ عودة أهاليها… شو نفع وقف “إطلاق النار” إذا مفاعيل الحرب (التدمير) بعدها مكمّلة بهدوء وصمت….؟؟؟
عم نحكي عن موازين قوى مش عن هدايا مجانيّة…!!!
في “هدنة… !” يعني فينا نحكي لأنّو بالحرب بتبقوا فالقين راسنا بِ أكتر شعار استبدادي هارِسّنا من عقود :
“لا صوت يعلو صوت المعركة” …!!
خفّفوا بطولات وتحليلات..!
تاريخ 18 نيسان 2026
…………………………………………….
أبو وسام وحزني العميق
تنتابني موجاتُ حزنٍ عميق ، أخالُ ارتدادتها داخلي معاودةً للقصفِ الهمجيّ العنيف…هاتفني الكثير من الأحبّة، منذ الفجر الباكر الذي شهدتُ بزوغه الثقيل بفعل دخان قذائفهم السوداء العمياء… إنهارت دموعي إثناء مكالمة عزيز وحبيب في محاولةٍ فاشلة لإثبات تفوقي عليه ب حبّ بلدتي وأهلها وما نجحت… أبو وسام لك محبتي ومودتي واحترامي وإن كنتَ سببَ بُكائي الصادق والعفوي ..
تاريخ 17 نيسان 2026
………………………………………………..
لا باب مندب نندب عليه
يا حبيبي يا عيني …
إذا المصالح مش واحدة المسار والمصير مش واحد…
(كل واحد معلّق ب مساره ومصيره وما كسبت يداه).
… نحن ما عِنّا مضيق نخاف عليه ولا قناة منسترِد من خلالها أموال لإعادة الإعمار ولا باب (مندب) نندُب ع أعتابه …
نقاتل كي يبقى الوطن ونعيشُ لبقائِهِ…
ما عنّا يورانيوم مخصّب، ولا ترسانة أسلحة جرثومية وباليستيّة، ولا أموال محجوزة بفعل عقوبات خارجيّة.. (أموالنا سُرِقت من منظومة حاكمتنا من عقود )…مسارُنا غير مسار، ما بدها نقاش .. نحن ما منحمل ولا منتحمّل أوزان إضافيّة… حقوقنا هي أرضنا وسيادتنا وأمننا…
في شباب عم تقاتل باللّحم الحيّ قلوبنا معها لَ حدّ الحدود الدولية مع فلسطين المحتلّة أكتر من هيك بصير الحكي اليوم : “لتِلكَ البلاد ربٌ يحميها “…
عم إكتب وانا عمّ إسمع ، لأني على مقربة ولستُ مهاجراً(!) ، ازيزَ الرصاص بين أبطالٍ من بلادي و همجٌ رُعاع أغلاظ ، أتوا من كل أصقاع الأرض ليدوسوا على قلوبنا… خسئوا….
تاريخ 13 نيسان 2026
…………………………………………………..
يرقصون فرحا
كنتُ لا أعتقد لكنني بتُّ أصدّق :
– أن الأزهارَ ترقصُ فرحاً وتُصدِرُ أصواتاً حين تسمعُ من بعيد هدير سيارة من تعرِفهُ آتياً ليُسقيها ويقفُ على خاطرِها.
-إن القططَ والكلاب والعصافير تجتمعُ معاً بسلام عند المِحن والكوارث، دون إبرام معاهدة عدم إعتداء، ينتظرونَ ما سيُقدَم لهُم من مأكلٍ وماء وحياة …
– حين هممّتُ بالعودةِ ، إلى عملي حيثُ أنا ، سمعتِهم يقولون كلٌ بلغتِهِ : كن حذراً على طريق العودة ولا تتأخرّ علينا في المرةِ القادمة … (المغامرة رقم ١١)
تاريخ 11 نيسان 2026
……………………………………………………..
باقون نأكل المجدرة
نلمّلم أشلاءنا…
نواري شهداءنا الثرى…
نُصَبّحُ على الأحياءِ الباقين…
نعاودُ بناءَ ما تكسّر في المستشفى اللبناني_ الإيطالي ..
باقون باقون باقون…
سنأكل المجدّرة… ولن يمحو ذكرنا…. َ
سينهض طائر الفينيق لا محالة…
تاريخ 7 نيسان 2026
………………………………………………
شامبو النصر!
أفيدونا يرحمكم الله :
عم حاول إسمع كل المحللين السياسيين والعسكريين والمتطاولين الطفيليين لأوصل ل جواب أو شبه مقاربة ليس لتاريخ إنتهاء هيدي الحرب (!) بل لبناء خطة إحتياط موزونة : كم قنينة شامبو وبارفين وdeodorant ومعجون أسنان وحلاقة وجل وشفرات ونظارات وتشيرتات بدي إشتري ل نهاية الحرب وإعلان “النصر” … ؟؟؟
عم فكر إتوجه شرقا وإحجز نص كونتينر من الصين…هني بيعرفوا أكيد كونهم حلفاء معنا بالمحور …
قولكم بكفي نص، واللا بعبيه لجمامو ؟؟؟
تاريخ 6 نيسان 2026
…………………………………………….
مشهدان ومفارقة
مُفارقة :
١- بقرار، ثُلث الشعب اللبناني بينطرَد من أرضو بدون إنذار، وبدون ما ينعَطى وقت تيضُب كلاكيشو وبدون سحور .. هالخبر بيمرق عالسَكِت و ب صمتٍ مُطبق وبدون إحتجاج ومظاهرات ويافطات ومنابر ..
٢- قرار ب ِعدم إعتماد سفير وضرورة تنحيّه ،خلال إسبوع ليضب أوراقه ، لإفساح المَجال لسفيرٍ آخر مكانه …
بتخرب الدني : مظاهرات ومواويل و صراخ و فتاقات وتفتفة وأدرنالين وإنذارات وتهم ووعود ووعيد.. وغالبية المعترضين هني من المطرودين قبلاً بِ ليلةٍ ليلاء..!!!
الأولى مسألةٌ فيها نَظر…!
الثانية جريمةٌ لا تُغتفَر…!!
بصراحة تامّة : شعبنا أهمّ من كل السُفرا… ينقبروا كلهم يفلّوا…
كلّن رح بفلّوا وبيبقى الجنوب ولبنان إيماني ويقيني ساطع ك إسوارة ،فيروز ، العروس…
تاريخ 31 آذار 2026
…………………………………………………..
مناقيش ومعلبات!
البلد في فوضى كاملة شاملة
- يلّلي بيعمل منقوشة واحدة وبيضيّفها ل نازح بدو يّانا نعملو لوحة تخلّد إسمه….
“قضاة و رؤساء محاكم” (أغلبهم زعران أوباش) غبّ الطلب تُحاكم كلّ من لا يحفَظ ويردّد كَ الببغاء إستظهار أُعِدّت مُسبقاً….
- يلّلي قاعدين بين الناس وفي المناطق الخلفيّة أو في الإستديوهات يصنّفون اللبنانيّين على هواهم هم في الحقيقة يلغون، عن قصد أو عن غير قصد، بطولات من يقف على خط الدفاع الأول… لا تحريرَ لأرض دونَ وحدة شعبٍ بأغلبِه…! لماذا تُصرّون على تقسيمه ؟؟!!
- خسارةُ الحرب تبدأ حين تخّسر “ظهرك” لأتفه الأسباب…
- يلّلي عم بقاتل عالحدود عم يوعد الناس، ضمناً، بالتحرير والحرية. وأبداً هيدا ليس له علاقة بِ يلّلي عم بهدد المواطنين بالمحاسبة والوعيد وعم يتوعّد الدولة والحكومة بِ “قلب الطاولة “…..
قبل ما إنسى :
بعتولنا منقوشة سخنة وخدوا مننا مُعلّبات رح يخلَص تاريخها فيرحمكم الله….
تاريخ 30 آذار 2026
………………………………………………
دكتيلو حبوش
شي بدوّخ فعلاً… الدنيا حرب والبنزين غالي والعِيل مشتّتة وأهل الضيعة كل واحد ب مطرح :شي بالجبل شي بالوادي شي عالرصيف شى بالشاليه شي مسافر….. كيف وأيمتن لحقوا، مثلاً، أهل حبوش يجتمعوا ويتناقشوا ويطلّعو بيان تبرؤ من الوزير فادي مكي بِ هالسرعة… شو هالدكتيلو السريع هيدا..
صرتوا مدعاة ل الشفقة والله…
تاريخ 26 آذار 2026
………………………………………………
بيانات غب الطلب
بلدنا مقسوم ومطروح ومضروب ومجموعة عليه كل مصايب الدنيا… مجتمعاتنا مفكّكة… ما في اتنين ب العيلة، أي عيلة، بيحكوا مع بعض أو بزوروا بعض … بيتقاتلوا عشان الولاد أو النسوان أو متر أرض أو ٥٠ دولار …. بسّ سبحان الله كيف دغري ” بيجتمعوا ” ع موقف ضد حدا من أفراد العيلة نفسها ( يا غيرة الدين ) بكون موقفه عكس ما هو مُشاع و مزوّر ( آل الأمين آل اسماعيل آل قطيش آل مملوك آل شعيب آل فحص آل شويخ …) وكيف بتنخلق هـ ” الوحدة” وهـ “التناغم” ب لحظة وبقدرة قادر!!! معقول يكون في بِ كل عيلة “دكتيلوا وليّ “بصيغ بيانات وبيطبعها وبوزّعها ، غبّ الطلب، باسمها… بسّ هيي ، العيلة، أكيد ما معها خبر….
إحترموا عقول من تبقّى منّا… لا إمام سوى العقل…
تاريخ 24 آذار 2026
………………………………………
